Tiempo ‘e zampogne

Tiempo ‘e zampogne

L’avimmo visto, ‘st’anno n’ata vota,
‘o tiempo ‘e quanno sonano ‘e zzampogne:

ma comme vota ‘e pressa chesta rota
haie voglia d’’a fremma’ cu ddiente e ogne.

Se sente ‘addore ‘e ‘ncienzo ‘mmiez’’a via,
sciùliano ‘a dint’’e spase ‘e capitune,
na vecchia murmurea n’Avummaria,
sparano quacche tracco duje guagliune;

ullero – ullero, abboffa ‘o zampugnaro,
ullero – ullero, canta ’a ciaramella,
mente cu ‘o ffuoco sotto, int’’a caurara,
se coceno ‘e ccacace cu ‘e nnucelle.

‘o pasticciero, dint’’a na vetrina,
mo spanne ‘e roccocò cu ‘e susamielle;
‘o verdummaro, affianco ê mandarine,
ha fatto nu Vesuvio cu ‘e friarielle.

Pitta nu San Giuseppe ‘o pasturaro,
‘mperetta ‘o canteniero tutt’’o vino.
Na figliulella, doppo ‘o paro e ‘o sparo,
accatta, p’’o presebbio, nu Bammino.

‘Ntratanto, ‘o zampugnaro cagna casa,
e abboffa n’ata vota int’’a zampogna,
mente pe’ ssott’’e pporte sisca e trase
na tramuntana ca ne zompa ll’ogne.

Venuto è ‘o tiempo ca nascette Dio,
pe’ chist’at’anno e pe’ tant’anne ancora,
ma nun vola p’’o munno l’alleria
saglieno ‘e vvoce ‘ncielo add’’o Signore:

nu cchiù trivule e guaje, arrassusia!
Nu cchiù, nu cchiù, Signo’, taluorne e gguerre!
Tu ca si ‘o pate ‘e tutte, ca si’ Dio,
mànnace ‘a pace ‘ncopp’a cchesta terra.

(Poesia di Carlo Avvisati)